انمار الكعبي / ديوانية
سافرت راحت فرحتي ومن كفاج الليل ليل يطشني هلهولة تتن
كدرت طولي بغيابج صار فيت وبالجفن
كلي ياكلبي شجرالك ليش حالك بي صهيل الناي راكد
ظلهة جان بروحي كاعد
واني اخاف اعليهه كلش لاتروح
وتترك بصدري الجروح
النار تضحك للكواغد
امشي واتلفت واباوع بلكي هي
هيه هيه بصفنة صار اتراب بيه
الروح تعطش شوف واتوازه اعله جيه
واختل بنص نار وابرد لو يمر اوداع بيه
وصوتي ظل بكفاج ينده ..بس تعالي
الليل رافكني ويطيقج والسهر بعدج حلالي
الناس ماعرفت البيه وما درت شنهو الجرالي
كمت اشوفج وي خيالي….
والمس اثيابج عطر واعزف عشك واتمشى جف ويالردن
واستورح بسكتت ضوه ومامش حضن
والكه اعله رف السكتة متشلبي الحزن
وارجع ادور امرايتي وما الكه وجهي
والكه بيه جروح وانزع روح ويرد الحزن
وبجفني ما يكضي السهر
والسجة تاخذني واجيج
واوكع بزلفج مطر
وانزل اعلى اشفافج نهر
يالرحتي ماخذتي النظر
يالرحتي طفيتي الكمر
والليل وحشة بدونج ومابي عرف
اهنا يمن روحي انطوت ماشة بزلف .. لاتخليني شبه نبتة بجرف
وماصفتلي الدنيا من بعدج ظلام
ومن مشيتي الدنيا راحت وغنه بجروحي الحمام
ومن ذكرتج فاض شوكي وبيهه ليل
وتاه جدمي بسجة ما مراهه ريل
ومن حسرتي اعيج صار اظلم نهاري
يالي ماغبتي ولا لحظة اعله بالي
بصدري دخان الليالي
اتفكد الباب اعله غالي
وشنهو حالي الشيب ينشاف بخيالي
