حسام الفراتي/ الانبار
مريني عمري خلص بين المحطة وعذر
انداس وجهه وخلك ومكابر بعبرتي
ليلج صلبني بسهر عاشگ اظن تهمتي
محتار اطيعن منو گلبي انه لو عزتي
وينج كواغد صرت سافرت ادور دفو
مو نار اضم صورتج بيه واحس هيبتي
بيدر سوالف بقت فزن تره بداخلي
مرينه جنه بعشگ وريلج جزه سجتي.
مخنوگ بعدج صرت رية اعله گد النفس
استاحش اكولن جذب هلبت تطب صفنتي
دگه انه حلمي صفه بظلوعي افكلج گلب
سرگي ويهفني الهوه ارجع انه بفشلتي
طيفج اجاني ورحل گتله انتظر راح اجي
راح وتركني بدرب خلاني في حيرتي
نخلة وجهال السلف رادو تمر دنگت
طلعو شماتة جذب كسرو ظهر سعفتي
صيحيني حتلو غلط لامو شرط بالصدگ
اندار فدوة وحجل خليني احس قيمتي
جدمج اذا مايجي مو حد احطله عذر
مناطرج عالجفن خاطر تچن دمعتي
كل صفنة مني بوجع تاخذني مدري لوين
هندس وادور ورد عاگول اجه بحصتي
دليني بس الاصح ذليني خل احترگ
شنهي الكرامة فرض وياج احب ذلتي
وياج حلمي تره زفة وهلاهل ردت
طفل ويجيني شبهه منج تره فرحتي.
