الشاعر نوفل الصافي

1ـ الجرح

الجرح رايدله شاعر ..

ايأشر اعله اهلال عيده

اومن يچل القلم بيده ايقط اصبعه..

ومايتاني الباچر ايكمل القصيدة

2 ـ أحــلم ـ

گال أحلم…أحلم..

رطــّب جفنك العطشان واحلم

گتله أحلم كون ماأحلم بعد

لأن ترطيب الجفن تهمة خطيرة

وضد قناعات البلد

3 ـ روحي ـ

روحي طيرة من الجنوب

امفرفحة ابغابة طفوف

روحي أمّ اوتيّهت بزيارة ابنها اونيّة الوادم رحيل

وشابحة العين وتطوف

روحي لعّابة غفت بچفوف طفلة

من صَحَت مالگت أحد.. فقط نظرة رعب مليانة المكان

ومزرعة خوف اوخواطر تقره ملحمة الجفوف

يانهاري العشته آه..

وكاسريته ابليلي أوف

روحي من تضحك تخاف..

وره الضحكة طلابة خاف!!

وتبني من الخجل طوف

اشلون أضحك ؟

وآنه اشوفن غصن زيتون السلام

ابحلگ ضبّة من السيوف.

4 ـ شكرا ًـ

گال اذا تحتاجني مشكول ذمة اتمر عليه

اوهذا كارت..

الاسم: فاضل ابو اصيبع..

العنوان النجف .. معروف في كل مكان

المهنة: دفان..

گتله شكرا.. مثلي مايحتاج مثلك

لأن ميت من زمان!!

5 ـ شاعر شعب ـ

شاعر شعب ..

ومن يصيرالشعب شاعر..

آنه اكرملي الســـكوت

ومن يصير الشعب شارع..

كلمن ايدوسه اويفوت

آنه اشرفلي اموت.. وانفجر باّول قصيدة

اوأبلع السان السكوت!!

6 ـ وطن ـ

مليت ادور وطن..

يندهني من الصبح

يبتسم من ابتسم..

ويبچي لـَوَن انجرح

دورت ماحصلت..

قررت امشي عكس

منجل واحش بالعمر..

بلكت احصــــــل گبر

عالأقل اسمه وطن..

بي اگعد اواستقر.

7ـ ياعراقي ـ

ياعراقي…

افرش اجناحك قريبة الشمس ماتبعد عليك

واروي غدران المحبة والحلم مابين اديك

ياعراقي..

بينك اوبين الشمس چفين حنطة..

طشها بوجوه التغشت گبل من تمر عليك .

ياعراقي آنه اعرفك ..

منجلك يلهث بديك..

وگاعك من اسنين تربي اعيونها الدربك عليك

ياعراقي.. النخلة صوتك ..الفرات ودجلة صوتك..

انطي صوتك للّي صوته ابيوم مازاود عليك

ياعراقي..آنه ماخايف غريب عليك

آنه خايف منك ايدور عليك

ياعراقي ..

سهم عاشور ابعدوك.. اوعيد المبارك عليك