اثير السعداوي / ناصرية
نسيتك كوه موش براحة البال
ومر ذكرك بروحي والجرح عال
كل يوم بجرح يتخلف اجفاك
ولمن بيت بيه وصارن اعيال
لايرهم دوه ولايرهم اضماد
بس شوفة اعيونك ترحم الحال
مانمت اعلى فكدك يشهد الليل
يالموكف صفنتي وحسبة البال
لون أدري ترد بشك الهدوم
وعلي لبكه بجفاك مهدل اهدال
تانيتك تجيني بجية العيد
وتعطلت وكولن يمكن اشكال
واجه العيد وتعطل جدمك شبي
شني بالمكبرة ماعدكم اهلال
صفنتي طولت بدروبك اهواي
اليمر ويشوفني حسباله تمثال
اليحط اذنه اعلى كلبي يسمع اصريخ
صدك راعي المروة حمل وشال
من اطر المكبرة يعرفوني عليك
من وني وحسرتي تفطر الجبال
مبينه رسوم وجهي فاكد اعزاز
من حنيت كفاي وحملك المال
افك ريجي بنعاوي من احجي وياك
اليفك ريجه نعاوي شيرجه من فال
ارسمت صورتك ابيبان العيون
ونهر بخدودي صاير والدمع سال
لون تدري بجفاك اصار بالروح
مثل طحية مضيف وجفيه دلال
انه هيج بجفاك مركد اركاد
الخيمة بلا أمان بدون الحبال
عطشت عيني ملكه ورادت اشوف
منك لو يمرهه مبارك اخيال
تانيتك حلم وتكحل العيون
العيد اشكد عزيز بعين الاطفال
اتاني الياوكت وتنطر تعود
اليتنطر ثكيلة بعينه الميال
