عمر عواد / ديالى
طلعتك دون شوري تكلفك هواي
جرح بابي بجفاك الهسه منسد
لومن بيتي طالع چان رديت
طالع من كلب ما زعل احد
انه انطيتك مكان ونادم عليه
لان بس امي جانت بيه تگعد
طاحت دمعتي ولو تعرف شطاح
اثر وجهك مسحته وياه عالخد
بالغت بعشرتك وانه غلطان
لازم جنت احط العشرتك حد
يالكاسر كلمتي وظهري مكسور
كلمتي تهون !!؟ ظهري بيش ينشد
راحة بالي طلعت تركض عليك
ابشرك بالي بعده الهسه مارد
عله واهس طلعتك طلعت الروح
مامش حيل بيه انفاسي تصعد
تشهيني برجعتك انه شبعــــان
مرورة فرگتك بالـــــريج تركــــــد
درب ردگ يرجعك وين متريد
اليدوس احساس عاشك حصته الصد
طيب شتاك حضني وساتر عليك
صيفك مايطوّل هسه تبرد
جاي تريد ترجع وين اخليك
انه الينطيني ظهره ينحسب ند
ماسديت باب بوجه العزاز
بس ابوجهك انته الباب ينسد
