محمد السيد عايد/ النجف الاشرف
كاسرت دمعي بلونك وضحكتك
وشرّيت ذنبي كبال عزف اللحن
امخضّر شلب مرواح خل جيتك
الشبكة كشختهه أثر بالحضن
فختايه طيشي وجلّب بشجرتك
نيتي احسب الشيب الطلع بالجفن
تخدر جفوفي من تكّظ حلقتك
وايخضر بروحي عرس منسجن
تنام شمس الله تحت كذلتك
من جنّه نتسامر بظل الغصن
من جنت اصير كلادة يم ركبتك
وجفوفي تتمرجح دفوا اعله المتن
عاين كلاني الشيب وبخطوتك
بيّن الشيب وما اببالك تحن
كلما اعاتب روحي جي حبتك
بعتابي هرش يخضّر امن ارد اون
شايل سنابل ترفة وبغيبتك
كل المناجل جلبّن بالردن
تابوت جابوا واذكرت عشرتك
مي ورد دزلي حته هسه اندفن
