امجد الحلفي / سماوه
عكست وانلظم خيط الگصص صيهود
ولا يعرگ الغيم وعالصبح نده
دارت والشوارب عشرة وي الشال
ولا شارب هديب اتنومس بهده
فاضت والترف يطفه ويشب نيران
لجن گرصت الماي حرورة السدة
سيف انه اعله خدي العوز زنجر ثوب
الوكت فرفح ضحك بس اللمع حده
وكت حدب الحيد وشمخ راس هدان
وهضيمة الدمع هد يتمرگص بخده
يدنيا او الدهر طحنت رحاچ الخوش
وانه مورم جرح بس اللحد شده
تماده الحنظل وحط راسه وي التين
وجزه الزردوم كلش ما كمش حده
البشر جرة نفس عثرة بلهاة الريح
اختنگ عزريل گد الروحة والردة
تاهت والترافة بلا شكل لا لون
نده العاگول صار ومو نده الوردة
يرب مامش(علي)وخيبر وصل للراس
عدنه شگد علي بس عينه مو رمدة
اكو الصنگر رفيجه وعمره صم تراب
واكو خاله الجبل بس روحه بالشرة
اكو رفيج الچمه بس خشمه طگ بالغيم
واكو رفيج النخل بس خشم ما عنده
اكوووو…
كافي الاكو من الاكو عدنه هواي
لجن ماكو اليتجي بميله الشدة
چنت حايط ستر واشبيح للبسمار
ولمن گام ايتگلگل غلست عمده
مرض يدفر مرض والدوه اصفر صار
مشلوش والسگم ملتاج ما يهده
مهي گعده لدغ والخزرة تعمي الذيب
غلطان اليگلك تكتل الوحدة
