أغنية / البارحة

البارحة .. هاجت أشواك العمر كلها , البارحة ..

وحنيّت الك باكبر همومي , البارحة ..

حنيّت الك حّنةّّّ غريب ويذكر أحبابه بعد غيبة وسفر ..

شايف حنين العمر لايام الصبا , يتمنى يرجع ساعة لايام الصغر ؟

شايف حنين الصيف لايامه إذا جاه الشتا

هاكثر يلتم حزن مابين الشجر ؟

شايف حنين الأرض في قيظ الزمن

تنفطر ملهوفة عالقطرة مطر ؟

شايف حنين الطير من يعود بوقت الغروب لعشّه

ومايلكى وليفه , والشمس غابت , ولاعنده خبر ؟

حنيّت الك ..

وردتك تعاشرني ابدال انجوم كانت سارحة ..

نجمة تسامرني غصب ونجمة تكليّ رايحة ..

البارحة ..

** ** **

البارحة , وصيّت الك ..

وياما البحر ضيّع وصايا السفن والسّفانة ..

وصيّـت الك ..

وياما الدهر غرّق أشواك العاشك بأحزانه ..

وصيّت الك ..

وياما الوطن ضيّع عناوين الأحبة ويّ عنوانه

وصيّت الك ..

وصيّت الك حتى العصافير الزغار الفرحّت دنيانه

طارت ابشوكي امغبشه ماخذها الهوى فرحانة

ولمّا ذبل ورد الصبر ,

رجعت لي مهمومة يعيني وهاكثر حزنانة !!

وطاحت هموم الليل فوك اجفوني

وي مجرى الدموع الجارحة .

والمشكلة , نجمة تسامرني غصب ونجمة تكليّ رايحة ..!

** ** **

البارحة ..

غنيّت الك كل الأغاني الليّ تحبها , البارحة

وردتك تجي ..

وكنت أحسب العشاك يلتمّون عندي البارحة

وبلكت تجي ..!

ولميّت الك كل الأشعار العندي حتى احجيلك

أحلى الكلام الليّ يبوس عيونك ويضويلك

وردتك تجي لابس قوافي الذهب كلها الليّ صغتها بحبك

.. و حتى اشكيلك ..

اشكيلك من الدهر عّذبني بغيابك , ويزعل من اغنيلك

اشكيلك من الغدر .. من كثر الأنذال السرقوا اشعاري ومواويلك

اشكيلك من الدنيا ماترضالي أزرع لك ورد بالوطن وازهيلك

ردتك تجي ..

لكن الظلمة خيّمت , واسمع أنين العاشكين ابكلب هذا الليل

كلمن فاقد أحبابه غصب , وكل يوم يسمع نايحة

البارحة ..

** ** **

البارحة , صوتك اسمعه يعتبّ من ابعيد , اسمعه ..

منين ؟ اصيح امنين ؟

ياصوت النخل بالريح يبجي ودمعي دمعه !ّ!

منين ؟ اصيح امنين ؟

ياصوت الوطن مذبوح , وماكو أحدّ يسمعه ..

منين ؟ اصيح امنين ؟

يحبيّب , شقيق الروح , ياحلم المحبة , الغرك في دمعه

ياصوت العراق بكل سجن مسجون ؟ وياكمرة تطلعه ؟؟

منين ؟اصيح امنين ؟

كأن الدنيا تبعد وأبعد اوياها وأسمعه

البارحة ..

والمشكلة , نجمة تسامرني غصب , ونجمة تكليّ رايحة .

البارحة ..