محمد الصابر/ بغداد

فرهدتني الدنيه باكت مني شاب 

مدري بيهه شلون كضيت العمر .

ضيعتني ودورت بيهه ولكيت 

روح شايب تارس سنينه جمر. 

مني أخذت كلشي حته الماكو راح 

وآنه منهه شماخذ دموع وكبر. 

بيه حسرة جاهل وضايعله عيد 

جفوفه من مجروحة مابيهن عطر.

ضحكة ماخلت تمر بشفافي ليش

حته هذا الهوى ليطب ريتي مر .

ذبت براسي شرفهه المنهه ضاع 

وهيه بت ليل وعلي باعت ستر.

كون هسه المثلي ينكط منه هيل 

موش بينه وبين تابوته شبر..

اليعثر بنص ظلمة عذره وياه اكيد 

وآنه يم شمس الله ادورلهه بعذر.

اركض الحد ما صبح كلشي بكفاي 

وارجع اركض بلكي فد شي ينتظر. 

والله من كد ما ماترف يكسرني ناي 

وردة إذا مر بيهه منجل انكسر.

بيه باعت وآنه والمامش صفيت. 

والمصيبة تكول ماجايبن سعر.

صاحت الشماتي هااا متونسين 

شفتو بيه شلون صاطرته صطر. 

خلت الماكضله نجمة يصير ليل 

وآنه احوك أحلامي بخيوط الفجر. 

صغيرة بيهه احلامي مو فد شي جبير

يكفي حايط ماردت منهه قصر.

حته لو مرني عشك جدا قنوع 

قيس اصيرن لو ضكت نظرة وخصر. 

من اغمض عيني راح اشتاك شوف 

اعمه واتمنى الوجوه الي تمر..

شنهو ذنبي جي عشت بيهه ابتليت 

قابل انه ايوب وادمن عالصبر .

شيب وجروح ودمع حسرة ابونين 

والله يعلم بعد مضموم اشكثر.