علي المواشي / نجف الاشرف
يالنبضات كلبي تواردن وياك…
الخلص شوفه ومتانيك مايكفي حلم وياك….
ارجع انه مويعكوب حته اشفه بقميصك ذاك…
تاه الراي…
شنهي البيه مايحويك وانته بكل شبر جناي….
تانيتك ورد ذبلان مر بيه بسوالف ماي…
حلاة الليل من تنطر ولف مشتاكله هوايه…
وحلاة الدمعة من تطيح تلكه خدود تجايه…
مثل خلكي ..النفس محتار…
من اباوع شيبي وانه لهسه بالعشرين اكسر خاطر ولاية…
ترس روحي التعال تصير واندهلك..
من خلقوك…ماحسبو اليه حساب…
امك تطلك بروحي وتجيبك ليش يم اهلك..
منهه لحظني ردتك كون حته بأيدي افطمنك….
عشك خدران من روحي من تجوع ارضعنك…
والوليلك ترافة وهيل من تنام اشمنك…
يبرخي منين اجيبنك…
تره مرورة فركتك ذبلتلي شفاي والونة اعله كد فركاك تتوسد…
تعال بروحي جم تشرين رايد بالدفو اتنهد…
محنة منين مالاكيك…
يالجنك حظن امي…
اليفارك من يمره الليل بيش ايقنع جروحه..
النده الضايك حسرتي يكون يشبع الوردة بملوحة..
الماشايف حبل الاعدام ماينلام من يظنه مرجوحة..
ليلة عاشر من تغيب احس تسير بروحي…
والكه احلامي معصوبات…
ونفس يتجه عالرية…
انه المخنوك من الشوك وانته اهناك جورية..
تعال وروحي ردهه وياك …
من مشيت الشماتة اخذوهه فصلية…
وشنو البيه…
كلب مشتاك يريد شويه حنيه ..
جفن نكظان من الون..
عقل مشلول بيك انجن…
عتب شايل يهد جبال لوسمعن…
يجي بهيئة محب عزريل من تروح..
يلمني ابين جنحانه..
ويلولي ليه جن وحيد واحس عيونه غركانة..
وياخذ روحي سكتة بليل خاطر مايفز جرحي…
