الشاعر / جمعة الحلفي
مسه الخير اعله بغداد
مسه الخير.. اعلى شباچ بالبصرة
اعله صحن الإمام بكربلا
عَ الگبة والحضرة
مسه الخير..
على عتبة بشمال الورد
على أبونا الفرات وطينته ودهلهْ
مسه الخير.. اعله دجلة الحزينة
الغافية الترفة
مسه الخير اعله شاعر بالعراق
على اوارقه وريشته وشمعه
مسه الخير اعله بستان الحزن
كل نخلة بيه دمعة
مسه الخير اعله گبر أمي
الغريب المدري وين..
بيا ثرى وتربة؟
مسه الخير اعله حزن أهلي الغميج
اعله العراقي وحيرته وصبره
مسه الخير
مسه الخير
