امين الموسوي/ النجف الاشرف
كسرة اشهك حسرتي بطعنتك نص الروح
بعت الملح والزاد للشامت بيش
انه الاعرفه مغزر ابطن البير
ملحك ويخوة يوسف أتوارد ليش
الزلمة من دون الأخو شحاله يصير
غربة وطن لبروحه كل عمره يعيش
حزام اعلى ظهرك جنت اطك ظهر الكاع
وانته طعنت ظهري وطحت كسرة جيش
ابحر الوكت من تغرك اتعنه جروف
وبحر عوزي احتاجلك متمر كيش
ظلع وظهر وياك أشد جنت الروح
بالخوة مافد يوم خاويت بطيش
جرحك يشك بنفاسي كدما مملوح
طلع بذيه تحجي جرح ابن معيش
اخو كلبي جفيت وصحت ياهيل
طعنتني وانه أنشدك صوت ياهيل
مثل عاكر تصير كبال ياهيل
بجفاك توسل التابوت بيه
تنَشف حسرتي الشمس كدما ملجوم
وبحيلي من اتَجه كل حيلي يبيد
جرحك قصيدة موت لو اموت ارتاح
بس الشماتة تذوقت صاحت عيد
بكل درب الكه آثارك بوجه الكاع
وعيون شامت تنطر بجرحي جديد
بدورة سنة جرحك يرفعون اذان
يجمعون اعلى الضلع عدهم عيد
برسوم وجهي تبين اثارك كام
والعنكبوت يتيه من التجعيد
مديتلك ايدي جسر ماوفيت
لتظن امده بعازتك يوم الايد
هيبة نجف البروحي ماطخ الراس
جنة علي معلمتني بس خوه تريد
بالخوه انكث كصص واختار الزين
ماخاوي ماصخ واحذر من التقليد
