عقيل الشمري/  بغداد

مانعرف حجي السجين 

حته نسولف ونجرح 

ملاجين بس نفلح 

شكد طيبين بينه اطباع عالغثونة بس نصفح..

ومغزرين..بالميتين

دموع العين من اطيح عالكبور نشوف املاحنه وتطفح…

سولتنه بذان الناس بس ننصح 

محبوبين جي ترفين 

اذا سولفنه وي الليل نخلي الشوك يتمرجح 

معروفين واصل صيت بينه الفاهي يتملح 

نعرف وين من نوكع 

النده الماطاح عالوردات مايندل..

عدنه شروط عالعينين 

لا متشوف مو زينين بالطيبين تتكحل..

نكطع عوج متعودين 

صح عدلين بس ناخذ طبع منجل..

بينه جروح ماتنشاف جي بكلوب 

زحمه نكول عدنه جروح 

حسبناهه نديم الروح فشله نعوفهه وترحل 

اشكد حلوين..

حت مرات بينه العسل يتختل..

ثكل جبال اي رزنين يمنه الخفة تتكتر..

مغرورين لا والله عالمغرور نتكبر..يم الطيبة لا نصغر

عالمفضوح بين الناس نتستر..

مثل اورود فواحين..

بينه الدنيه تتبخر..

حته العفة من اتصوم بينه اعتقد تسحر..

الحالم يبحث اعله الجود يمنه احلامه تتفسر..

نبجي هواي ..نحن هواي

نوفي هواي.. نغار هواي

مدحت هواي.. فخرت هواي

حقي بهاي 

عراقيين يمنه الغيرة خط احمر….