عباس العبوددي/ ديوانية
وفردشتهن وحدة وحدة سوالفي البيهن هويتك….
واشتهيتك… ضحكة خضره تردلي روحي الصوفرت حيل بمشيتك….
ومن لگيتك ذاك نعنانك ولا متغيير من الله…..
وكلشي البيه فز ملهوف فرض للخالقك صلى..
يابو زلوف غطيني اعله طولك ماي…
يواهس ليل …دلاني بمحطة صيف كلهه فياي..
تعال وياي… .خل نلتم ضوه النجمات….
ونفرع ذنوبنه بكل صوب… واصعد للعثك بآهات…
واتسرسح الك عنگود من يغازل الشفة..
واكرص وين ماكو افيش ..واعوف سوالف العفة…
وبده يغفي الگطه المتعوب واحنه ولا وچدنه نعاس…
وتغطينه برهاوة ليل وندهنه ذنوب بيهن فاح فاح عطر الياس…
يورد الله الترافة البيك تطي الماحظاله بليش…
يورد الله اليشم طاريك… يرد لايام ذاك الطيش…
وانت وذاك شوگ البيك يجفل بيه سبع سنين…
منين اندار واتعناك.. واطشرلك عشگ مريود چان بليلة معرسين…
يچفك ذاك يدغدني بفهاوة اااااه…واني وياك ما ننشاف…
يليلتنه نغزل بيهه بگايا جروح ماتقبل گبل تنراف…
ينجمة ليل ترچية لسمه العشاك ونشافت رغم ماچانت الغيمة…
وشمرنه الااااااخ غاد بطارف الهيمة…
تسامرنه وهذاك الطيف ماينمل…
مو وكتك يفجر الله الحلم معگود ما ينفل..
وكشفني وفرش ريشات حلمي البي فرشنه وكلشي مانندل….
ورديت لصباح الله الخبط چم ناي وي دمعه جفن ذبلان…
وهذاك انه… البقيت بظلمة الوادم ادوورلي حلم نعسان…
يمته بيا كتر نرتاح ونسيّر نده اعله الياس…
شوكت نرسم حمد موجود…وخدود السچج تنباس…
يعافيتي الصبح مكروه للاعمه…
يعافيتي السمه تغيم لون فگدت اثر نجمة…
يشوگ البيه الك… يفلان افرعلك عمر عشرين لو مريت اليه بطيف…
وانه متانيك هلبت غفلة لن موجود بس ماجيت الف ياحيف…
ومن لگيتك…
صدفة چانت والحلم كف روحه ذاكه البي هويتك..
