الشاعر / مهدي عبود السوداني
انه من اتخيلج ارجع شباب
مثل مابعيوني اشوفج شابة
كلبي حب بس جنه اول مرة حاب
وانتي جنج هم كبل ماحابة
ارجعنه لايام الصبا وفكينه باب
اشبكنه جمرات الاشواك اللاهبة
صح خذانه الشيب وسنين العذاب
بس نفسنه امن الهوى ماطايبة
وصح شمسنه بقهر مالت عالغياب
بس محبتنه شمس ما غايبة
كلوبنه تلهب احر من شمس اب
ومن لهيب الشوك والحب ذايبة
وارواحنا خضره وثمر بيها واعناب
وكاعها ابحيل البجر ماتاعبة
اشعلي باللي ايكلي شايب راسه شاب
ولايهمج باليكلج شايبة
الشعر اسود بس و كتنه اصبح ضباب
وبيده فضض شعر ولد الخايبة
العاجبه خل ينعجب حد الاعجاب
وخل يولي الينقد وماعاجبه
هوه لو بعيوني شافج مني تاب
ويعدل ويعذرني وايكض شاربه
ولايحاسب عاليحب وبشوك ذاب
تالي من ايحب ضميره ايحاسبه
انه لابوك لاصنف الارهاب
وانتي هم لابايكة ولاناهبة
وابد ماهو صاحبي الماكلبه حاب
لو ابوحده ايضل ابد ماصاحبه
الله انزل عالنبي الحب ابكتاب
بصدر كل اياته ربنا الكاتبه
