بشير المرشدي/سماوه
القصيده تتحدث عن معاناة فتاة تبلغ من العمر عشرين عاما فأجبروها اهلها على الزواج من رجل بعمر والدها لاسباب مادية .. عن لسان حال الفتاة
تقول
زغيرة وعمري تضحكله الفراشات
وتفوح اطيابي وتعطر البساتين
حمامة وريشي يكسر هيبة الريح
واشوف اصكور تربيلي وشواهين
باعوني ابرخص والسايم ايسوم
والشراي شايب عمره ستين
غصبوني ومشيت بخطوتي اجبال
ثكيلة وتكسر اظهور الدرابين
وزفوني لبشر مايملك احساس
ولايعرف يطبق منطق الدين
تتراجف اجفوفه بنسل الاجعود
وتجاعيده البوجهه اكبور ميتين
غزالة وحوطتني انياب الاطباع
واحتاريت اهب لياكتر وين
عشت مشمورة واترجه الجنانيز
واعتب بالمنية اشوكت تلفين
تجاوبني المنية ابفشلت السان
فشلت نهبة بصدور الدواوين
كهوه اني وربيت بدلة ارذال
وبخيلة اجفوفهم وي الفناجين
ماظكت العشك مجتوفة احساس
وصيفة وعايشة ابيت السلاطين
صديقاتي ابعشكهن ضاكن الكيف
وذبل بشفافهن واتخمر التين
يسألني وجوابي اتعثره الاشفاف
عثرة مهرة بحجور الثعابين
يفكني المستحه واتحجب اردود
ويجاوبني الشباب المن تفرعين
تمنيت السنين اتعاود اردود
وارجع طفلة وترد بيه الاسنين
