مسلم باسم الفتلاوي/ ناصرية
ضفيرة ليل مغزولة ويه رمش العين
تاه الشوف والسجة سوالف ريح ويه تراب
متشضي الونين وهوسه بالجرفين
والروجه سحكَها غراب
خضار الروح جافل حيل
متنطر حجاية غيم والمنجل يدك بالباب
بي جم (ليش) مختنكة
يمتى احجيهن وارتاح
حايط غار يبجي اعلى الشمس لونه
ويلجمه شما ضوه مصباح
واحبابي برد دمهم
ولا عين بدفو حجاية تصد ليه
وفتشت بملامحهم
ولّكَيت بتذاكرهم سفر لبعيد وعدهم راشدة النية
واحركَهن صورهم حيل بس ادري
السمه مو كَبر أي دخان
دخان البخور يموت بالرية
خلص جفني بالموادع
ولاطشيت مرة الماي
اطش دمعي و أزت روحي ويه كل جنطة
واظل مستاحش من الناس
اشوفنهم خلكَ منكَار
وانه بيه وجه حنطة
يا روحي بعد للشمس مابينه
يا روحي الضوه يتعافى من تكثر روازينه
