ذو الفقار الياسري/ بغداد
اني بعتك من بعت بس ابلاش
وما اكول اتراب لن غالي التراب
انته مو كتلي انتهت راجعلي ليش
كافي تحجي سد مواضيع العتاب
روح دورلك بشر يضحك عليك
مثلك يخون ويحب يوميه شاب
روح أخذ سجينك واجرح غريب
جرحي نايم منك وهستوه طاب
جايني اتكلي تعال ابروحي طير
اشلون أطير وشايل ابجهك ضباب
ابكلبي رايد تقره صفحات الحنان
انته تعرف تقره حتى اتحب كتاب
من خنت لتكلي ما اعرف نسبت
انته فاقد كلشي ما فاقد صواب
ما نسيتك لاتكلي اني نسيت
وجنت فد مرتاح بيام الغياب
ماصدكك منقهر باجي ابراي
شعرك اسود لو صدك جا شفته شاب
غيري ماحبيت لجذب حرام
الف واحد لا قليلة هوايه حاب
اشلون افكلك كلبي ما امن اخاف
انته والسجينة نفس الطبه طاب
انته مايك من غدر مو من جروف
ابكاسي مو ماي العشك سم انته صاب
من اذكرك جادر ابراسي يطيح
ومن اشوفك جني داخل بالمصاب
ما تتوب انته ابد ويمكن تتوب
من اشوف ابليس راح اربه تاب
