الشاعر / صاحب الضويري
الماي شال تراب لو مر بالتراب
ولو جره بين الصخر كلش يطيب
احنه مثل الماي صفانه العذاب
ولو شرب من ماينه معلعل يطيب
امتحنه سنينه مية امتحان
وماعرفنه شتمتحنه سنينه
نغطها ساعة والعقل عند العنان
وساعة بظهور الليالي تغيرنه
مدري احنه ندير دولاب الزمان
مدري دولاب الزمان يديرنه
شو اشوفنه الشمس قبل الغياب!!
هم ترد اردود وارگت عالمغيب
لاتسولف لو جزه وكت الشباب
هاي دنيا وشيبت گبل المشيب
يظل يفر دولابها بكيفه ويطوف
هاي دنيا ومن تفر بكيفها
عاشروها وگطعت منهم چفوف
وشتموها ورد عليهم سيفهه
واحنه مثل الناس بالديرة ضيوف
وعاد مدري شلونها وي ضيفهه
واني وي دنياي صفيت الحساب
من شفت عيسى رگد فوگ الصليب
حسين ذاك حسينها وذاك المصاب
ظال بيهه المنتظر مثل الغريب
ها يليل شحصلت من النهار؟
ويانهار شحصلت من ليلك؟
ويا صباح الله الچشفتنه الستار
اشفنه بيك البارحة ونحچيلك
ويا صباح الله شـ مشه بيك القطار
وشكثر نام الگطه بشليلك؟
واني ذاك الما طلع من الگراب
جنزريت وحار بدواي الطبيب
دورينه وردنه يوم من الاحباب
لنه ممشه سنين عن درب الحبيب
الدنيا هاي طباعها اطباع الجراد
المايخلي السنبل يطگ عوده
واااه يگلبي يلوگلك لبس السواد
والوكت كل يوم يظهر مودة
واني گلبي لو غده مثل بغداد
هم يرد بغداد ظلمة عجوده
هاي دنيا وچلچل عليها الضباب
الماتميز بعيده من القريب
واني بيه تجرعت مر العذاب
وكل عجيب المر عليّ ماهو عجيب
