أمي بكل شعر صغتلهه تمثال..

ورسمتهه بصورة متمر اعلة بالي..

امي وياي واقع حت بالاحلام..

وتعيش اوياي اكثر من خيالي..

وامي بكل بحر تلكاهه الامواج

وعله بحر الشعر فد شي مثالي..

وامي اعله الوزن وزنوهه بجبال

وعله راس الجبل راس امي عالي..

وامي على الدنية تكلي غلطان 

وتتبعهه بلحن يبني يغالي..

وامي بيوم مرنه وصادفت عوز

شفتهه تناجي ربنه وتندعيله..

طلع مو من ادينه انوفر الزاد

دعاء امي طلع هوه الوسيلة..

وامي الما رضتنه انام جياع

عدنه افلوس جانت بس قليلة..

سألت امي اشعجب متروح خطار

تكلي الما يجيلي اشلون اجيله..

شفت كلماتهه تمر بيهه حسرات

تريد اتروح بس ما عدهه حيلة..

تطلع كل فجر ثاري امي للسوك

تجيب اطحين بس ما عدهه شيلة

وامي بيوم مرضت وطت الراس 

وعله افراش القهر امي عليلة

اعاينهه بچت ما تكدر تكوم

وكع عدنه طفل ركضت تشيله

امي تعيش واقع من قدمهه

وحليب البيهه طاهر منقي دمهه

اذا الجنات تدني من قدمهه

لبوس اجدامهه صبح ومسيه