كرار هواري / بغداد
عليك ليا شهادة انگول مبروك
وقلم لو تفگه اعلكلك مناير
تحزمت بفشگ گبل الدراسات
وعله الساتر تشخبط بالمناحر
وراك شگد چفيت بضهرك الماي
عليك ومو نهر حته النواضر
دورتك حلم بي الگه عريس
لگيت بكل حلم منصوب چادر
عگد خلصت الشيلة بكد النذور
ولكيتك عالشهادة الروح الناذر
سألت شكم قلم ماشافك احروف
وخميت النقاط البالدفاتر
امنتك حبر بسطور الاوراق
وخذاك بلا اثر ريح العواصر
اطر دربي بلهفتي بواهس الگاك
مثل لهفة اگماط اتلفه عاجر
نبرة صوت ملگه اتعودت بيك
بس نبرة سكتك سيف كاسر
خلص شوفنه بصفنات الافراگ
مثل صفنة امگرم حاله صابر
رخي اعنان هجرك والجم الشوك
الم بسوالفك ويطمني حافر
يانجمة سلفنه بخنكة الليل
يالمفارگنه ومراضي السواتر
اتشلبه عله طيفه بخيط الجفون
واحير بيا حلم الگه التذاكر
هواك بيا فجر حته اغبش اشراع
تهت واندلني بس درب المگابر
صرت صورة اتشلبه بلا الحياطين
تفطر حايطك وانهدلي خاطر
اشاور بالصور لا يسمع البال
واصدگ واهسي الجيتك وناطر
عليك ابگد تعال انصاغ فرگاك
وموبس الشعر طاحت مشاعر
من اذكرك سالفة تغصص حجي النار
بعدك ماتعرف اتكض خواصر
ارهم اسوالفك عالصورة مرات
واشگ تاريخهه الذكرني حاضر
مالحتك بديه شلون بالطيف
شرار طيوفك بجفني يتطاير
