مصطفى الدلفي/ ميسان
جامع .. بار
يله اختار
العاهر ركصت بالجامع
والمومن أذن بالبار
لو ينذبح حسين ابيتك
وبدمه اخونك تتمضمض
والعتبة اتعثر المختار !
ولو باكو وجه الله الغافي بضحكة طفلة
ولو شمو زلف التابوت وباكو ترجية من الرحلة
والبردي ايحكمونة بحجة
ﻻوه اجفوف الهوية الرادت
تشهك خصلة بشعر الهور !
بوكو السلة وبوكو البستان امن الشجرة
لآخر كطرة بخد ناعور !!
بس لتبوكون العصفور..
ولتحجون العبوة ابيتي
وتسكتون الدار ودور
يامسؤول اشويه اتهده
شوية اتهده وصير انسان
بطنك من تكبر بعيونك
تزغر بعيون الجوعان..
وماكلك بطل لتبوك
ﻻ ظل بوك
بس من اتحط دجلة ابجيبك
حطلك كطرة بعشر احلوك
ومن ينشك حلكك بالضحكة
اذكر ثوب امي المشكوك
وجهه نده امن التبريد
اوجه امي مخضر تلة افتوك
هوه الضاحك ماي بصدره
شمفهمه بونة المحروك
يامسؤول ابنك من يحتر
ياخذ راتب جم مخنوك
هم امجرب جيبك فارغ ويحرجك ابنك بالسوك
وهم امجرب مشلول انته
وابنك يبجي وكايد جوعه
وحرب ايران بجيبك تركض
والفكة بضهرك مطبوعة
واليدفع مليار بسهرة
مثل الدافع باب الزهره!!
مذموم وداعت كل شايب قاعدتو عثرة وعوجيه
وبكتو ظهره..
وراكض شيب براس الراحة
والياكل حك ام وطفلة مو ماكل تفاحة ادم
ماكل ادم والتفاحة
وليخنك عيدية جاهل
خانك ثلثين امن اسكينة
ومتمرجح دخان بخيمة
اعطش واشرب كيض اجيوبي
وللرشح هوست ابغيمة
اغفه وصوت ابني ايفززني
بوية المسؤول الحط يمنه
شفته بتالي الليل ايحوم
ومفرع راس الدربونة
وشالع من عفتهه كصيبة
وبيده امصلايه امضيعه الله
راد ايصلي..وفات الكرسي
ذبهه وضم القبلة بجيبه!!!!
