الشاعر / باقر جعفرالعلاق
من هسه اعتبرني اتندمت عالصار
واعتبر المضى ابشكل الحلم مرك
ماتسوه انتعاتب واني مامجبور
وياك استمر حتى اخضع الامرك
وهمني الكلب واني اعله نيتي وياك
وخسرت العمر بس كوني ماخسرك
دللتك طفل خاف الزعل ياذيك
بس انته الكباحة وياك من زغرك
مامقتنعة روحي ابعشرتك مليت
دورلك حبيب وعنده ضم سرك
امن الاول كلتلك عندك انته اخطاء
ومعرفت الينفعك من اليضرك
جربتك تراني بابسط الاشياء
وجنت امن ارد ازعلك رايد اختبرك
فرحتك عمر بس زعلتني هواي
ولو غيري ابمكاني ايصير ميعذرك
سكتني الخجل بس اني مامرتاح
جي تحجي ابرهاوة وميك ابصدرك
ماتفهم شريد ولافهمتك يوم
وهذا اكبر غلط خليتني انتظرك
كالولي الكلب صح مايحب اثنين
بس جائز الثاني ايريحك ابعمرك
ولتسلم الكلب بيد الضحك وياك
وترخي الحبل بعدين ويغدرك
والله ايصح بشر تنطيله ماي العين
بس هوة ابسهولة ايطعنك ابظهرك
ويصحلك بشر يتمنه بس تنخاه
يمتدلك جسر بالمحنة ويعبرك
منهم بالشكل لو شفته متشك بيه
ايعجبك بالحجي وبالمظهر ايغرك
لاتمنح ثقة وكلبك يلين ابساع
بعدين التمنحه اسرارك ايعيرك
