الشاعر / رياض النعماني
انسى كل الكتب
كل الّلي تعلمته .. وعرفته انساه
وتعال اهنا … كبال النهر
لو … وردة
انحني ليها وتأمل الأسرار
الماقبلها ….
ولا بعدها اسرار
اكعد للنهر :
لامس بروحك لونه الأزرك
واملي إيدك من هديله .. ومن هواه
اسمع سكتّه …
وصفنته
وموجه … وغناه
الوردي … راح اتشوف روحك
راح تعرفها … وتحبها
اتضوكها … وتمتلي بيها
واليضوك الروح … ويحب بيها
راح ايصير هوّ النقطة تحت الباء
هوّ النشوة …
لو راد الخمر ينتشي
هوّ الجهة اليتوجه إليها الكون
هوّ الّلي يسمّي
ويكتب
ويمحي
وتدور اعليه الأفلاك
ومثل ما يشتهي هوّ …. ويصير
ايصير
ويتحوّل إله …..
