قصيدة / ياعشكنه
يا عشكنه …..فرحة الطير…اليرد لعشوشه عصاري
ياعشكنه ايمد سوابيط العنب ونحوشه عصاري
كاعنه فضة وذهب واحنه شذرها
ياحلاة العمر لو ضاع ابعمرها
ياعشكنه….يا عشكنه
****
خذني للمرواح عود
خذني سن المنجلك
ومن يشع ضي الخدود
شمعة وبديرة هلك
اضوي لايام الحصاد الجاية
والبيادر كالجبال العالية
ماينه….اشطوط وسعد
وانسامنه…اطيور وورد
كاعنه فضة وذهب واحنه شذرها
ياحلاة العمر لو ضاع ابعمرها
ياعشكنه….ياعشكنه
****
ايدي وايدك عالمساحي…الدنيه تموز وشمس
وليلي اضوه من صباحي
والوكت زفة عرس
اتطوف اغانينه ابشلبنه وهورنه
ولوسعينه الخير خيرايزورنه
آمالنه… اتطك بالشجر
وجبالنه…ابعلو الكمر
كاعنه فضة وذهب واحنه شذرها
واشحلاة العمر لو ضاع ابعمرها
ياعشكنه………ياعشكنه
