رحمن الركابي/ ديوانية
اجو خطابه اليه واني مو بت بيت
وصارت علتي بالحالتين تذل
احجيها انكتل من اسكت يفضحون
قصتي وصار اهون لو انصاب بسل
اجوني سولفو بس همه مايدرون
جبيرة سوايتي وموضوعها يفشل
سألو شنهي برجج ماگلت عذراء
وباوع عالستر بس بيه حسرة تشل
دعيت مدنّگة كمت استحي ارفع راس
العشگ صخم وجاي وهيبتي تخجل
يربي بجاه عطفك والحنان البيك
استعجلي بمنيتي الملك خل ينزل
عليمن عايشة الوزاني مو شيطان
گلبي والقهرني الخان عهدك خل
تركني بمجتمع عدهم اليعشگ عيب
واني العيب صار بروحي متأصل
عشگته ورادني وانطيته روحي وخان
هذاك الجان اذا ذكروه يمي اجفل
اني الجنت هيبة وللستر عنوان
هسه اصبحت عار وعيبي خزه الكل
ابوي وهيبته وفزعاته لجيران
عالحيهم بعد فزعاته گلم تقل
غلطتي بالشرف لو باللساني تهون
تخلص باعتذار ابوسه بتوسل
بس البالشرف ما تخلص الا بموت
بحيث البينه عاقل گال اني اكتل
يكاسر رايتي على مرايه ماصديت
والله من الخجل من روحي كمت اختل
