فلاح مزهر / ديالى
يالبيك طيبة وهاجس من الشجر
لو بيدي اخذ ويه صوتك صور
يالصفنت كلشي الكبل ماصفن
شافك وكف مايمشي ظل النهر
كلش بعيد وشوفتك حسرتي
ويوميه اشوفك لأن وجهك كمر
مسدود بالي بوجه كلمن يطب
بس كلي من طبيت من ياممر
ماريد اسولف بيك خايف تره
من عيني احسدك خاف مو من بشر
وين انتمائي اتنازلت ياهلي
من شوكي الك ظليت احب السفر
تغيب الشمس تندار الك ياحلو
وتحده واحد شافك وماعثر
والليل صاحي لخاطرك ماغفه
وعيوني بس وياك تهوه السهر
ياحزن من شفتك ولاظل حزن
لمن عرفتك ماعرفت القهر
خجلان اكول الحمد لله وخلص
طولك ربيع اغمرني. بجمل قدر
ضحكتك حفلة وعيد ياضحكي
معقولة انت بهذا حسنك نفر
عيونك سفينة وشمس تحظن شمس
يمهن تغار ام الحور والخضر
شامات البركبتك مثل النجم
محليات طولك طول شعرك شهر
هب ياسمينك وانا كاس انتشه
تايه وخذني وياه لمن عبر
ماعندي كلشي وحرت شنطي لهلك
وحطيت روحي بظرف لهلك مهر
