مصطفى الرملي / صلاح الدين
كل الصار بينة يهون
خايف لاتجينة ايام
نتحسر سوى اعلى الراح..
خايف لاتجينة ايام
بيش الشجرة يتفقون
الحطاب و الفلاح
الطالب عادي مايسمع حجي الاستاذ
لو يترس الصف صياح
بس صدكوني خايف لاتجينة ايام
القفل يكوم مايسمع حجي المفتاح
ويخنكنة الوكت وتصير حتى النسمة ما تنلاح
صدكوني الامل ما مات
شما اذتنة هاي الناس
بعون الله يعوفونة ونرد نرتاح
شما صار البشر مغرور
ينزل خشمة لو لاكة بدرب قداح
حرامات البرائة تموت
اتمنى الطفل لمن يجينة العيد
مايلعب بعد ب اسلاح
ويختل يم ابوه و يرجف من الخوف
لو يحجولة عالذباح
لتحطوني فدوة بحلك هذا وذاك
انة بزعان من الناس
اهون لو تحطوني بحلك تمساح
ارد اصفن واكول الدنيا ولله بخير
مادام الخبز موجود
مادام الطفل عالسوك
وحدة يروح و وحدة يعود
مادام شوكت ماروح للمحبوب
الكة الدرب ما مسدود
ما دام الدمع لو طاح يلكة خدود
مادام (السمر) بالوطن مرتاحات
نضل ننطي زلم حد ما نزهك الدود
مادام الله كلشي يشوف
لابد ينكضن كل الليالي السود
