علي الركابي / واسط
كلولها
زغران حلمي الجنت اشبره بطولهه
واحجولهه
عن الروازين وسواليف الضوه دحجولهه
كلولها
القداح باكو ضحكته بحلقه و عرس
وتلولحت روح النجوم الماتت بوجه الشمس
رديت وجدامي تخط غنولهه
حنيت وعيوني شمع غنولهه
وصلولها
هدوم الزفاف تلوكلج
ويلوكلي حيل الجف
بياحيل الم روحي واجي
وستوني دافن لي وطن
بضلوعي اهيس كام يمردهه الهوه
واطشر بريتي ضعن
وجم عضمة مني امشي تكع حسبولهه
كلولها
وجهي وكفاي اتشابهن واستفحل برأسي الثلج
اي يادفو السبعين من اذكرج
النار اطفيهه من اوج
ظليت من دونج طرك جلد وهدم
ظليت من دونج كبر مابي اسم
النمل يخاذني متاع لديرته
وبالماي ضليت انثلم
وبلا بخور ومي ورد ردولهه
كلولها
عيون النثايه تكحلت من وجنتي
كدما كلت وجهي الشمس نكرتني حتى امرايتي
يتشيم بلونه الفحم والنار تاخذ غيبتي
واشا مشه بروحي البرد
وينج يحضن ولايتي
وينج ولا باجر عثر بحجايتي
وهاكم اسمعو اخر صدى وردولهه
ولم شكو بروحي هوه وردولهه
ارد اموت .ومااريد.يردني صوت
حتى.لو صوت.امي .كلولهه ارد اموت
ارد اموت وكون فوك اجنازتي تحط الفخاتي
والتشيعني صور محبوبتي
السدر من جيدهه الخدران
يطشر بروحي
ومن شذر ضحكتهه اسوي اكلاتي
واحضن صورهه وطلولي اجفنه بطولهه
كلولها
يكبر بعين ولايته اليعشك صدك
والمآخذ ولفه وغفه بالهوه يغص ويختنك
جم ديرة باتت على امل
وجم كمر تانه وعلى اخدوده الزعل
وهاكم ضفاير لهفتي وقرولهه
واخر نفس غركان مني اخذولهه
كلولها
زغران حلمي الجنت اشبره بطولهه
