علي الحمزاوي/ بابل
يهلهولة نده اعله الصيف ما تحجين
يكطرة ماي وكت العوز تتبدين
يخرخاشة مواعيدج تون بذني
عليمن جايه تنشدين
يراحة بالي مو جنتي علي تبجين
اشو هسه ويه غيري هواي تتمشين
امطريلي عشك مبيوك من وادم اصلهم دين
تفركثتي اعله حيلي وطاح حيلي الطين
ارجعيلي سمه بيه النجم خير
يريحة هيل اذا مر طيفج ابالي تفوحين
يكشخة ناي لو يعزف عله دومعج تغركين
تدنيلي خلص بيه المعاتب والحجي الموزين
لفين اعله جرجف واهس معرسين
لاتخافين انتي اول حبيبه وياي لاتخافين
بعدني اتذكر احجاياتج بأذني
كلتيلي بوكت جان الخريف يعيش.. صفي نيتك
العاشك الما صفه نيته سوالفه كلهن حرام
وكلتيلي.. امنيتي شجره وتوكف بغصني حمام
يا ورد جوري اعله كل صفته غرام
وكلتيلي.. ذبلي كلبك ..اريد اتعافه من حبك
ومن تبعد اظل امناطره بدربك
وتغصصني دمعتك بس اشربك
وهاي انتي تمرجحتي اعله ناعوري
وافزعلج شكو بروحي عشك بس كون ترتاحين
