كرار المرشدي / النجف الاشرف
مو كافي هجر تعب عيوني الليل
مات على الجفن جم حلم للملكه
اعصر بالي الك بالكوه اطيح طيف
وتشب نار البكلبي لطيفك اتحركه
اجر كلمة تعال ويا النفس دخان
تعال وجم تعال برتي مختنكه
درب اجفاك خضر بيه طاري اجدام
بخطواتك رسملي اثار للفركه
تجي نسمة لحد واحفر كبر بالهيل
وامد شيبي جفن واتلفلف بحركه
من امر ابابكم اترك ضلع تذكار
يتامه اضلوع عندي بعازة الشبكه
واحبس بالعتب وبريجي خنكة عود
وتر بجروحي لحن هدت الشهكه
افلس ضوه عييوني على الدرب نضرات
واتذكر اليوم الجنه بي رفكه
اعرفك ماتجي لتضل تلف ودور
تحجي وياي بس عيونك مدنكه
عبارات انفصالك بيها ترس وجوه
وشفتك بالعذار هواي تستنكه
البذره الماتطك تكسر ضهر فلاح
النهر يشرب اوادم لو نشف خلكه
النخل شامخ ولكن زوده بالسباح
تتصاقط اعثوكه لو نشف عركه
الاعمه يتيتم لو الكاده يموت
بقايه عيون بين اجفوفه ما تلكه
ينشاف الكمر شامه على خد الليل
الندى مرايات بي تتمكيج الوركه
الحقيقه المره تحجيها بكفه الفنجان
البشر طماع دنيه وجيبه فك حلكه
المو كد الفشك يتغسل ابارود
تره بشرع الرصاصه يفشل التفكه
