الشاعر / عزيز السماوي

اضحك دغش للوكت لو ثكل بيك اللوم

واهذي بسوالف جذب وادمنه اخذها النوم

بيع الضمير ابفلس لو حل عليك السوم

واكتل نثايه الشرف خاف اتحمل فد يوم

دنياك خرزة نذل طاف ابسماها البوم

خل تنشد اهل الصدكـَ وين الحمية اشلون

غمض عيون العرف لو كـَالوا شيكـَلون

شاعر………. طفل……… مجنون…!!!

ابوجه الأوادم ندم يالدنيه شنهو الصار

تدري بكـَـلوب التبن طافت بثر تيار

عمرك حلم مرتخي… غركـَـان وسط العار

رحمة المشي ابلا كـَـلب نسـّاني اخذ الثار

لو وّج مضيف السلف شعليّه غاد النار

دخان عمرك صعد مذبوح ما يدرون

غمض عيون العِرف لو كـَـالوا شيكـَلون

شاعر…………..طفل…………مجنون ..!!

احجي ابسوالف عطش وشفافي صارن بيض

والرية تيبس غفل مايك لغاد ايفيض

كـَـلبك سفينة غضب تِدوي ابحور الغيض

بسكوت مات الشته والكـَـيظ شايل كـَيظ

تجري بحروف الشرف نهران دم الحيض

انكـَـل سوالف صلف وامشي ابدرب مسكون

غمض عيون العِرف لو كـَـالوا شيكـَـلون

شاعر…………. طفل………… مجنون

ماتت وجوه الخجل صوت النثايه ايصيح

مكتوب معنى الشرف برمال اخذها الريح

بالكـَـصه ما ظل عركـَ والغيرة نكـَـطه اتسيح

العار لف النَفِس ماتسوه خلها اتطيح

جذب السوالف طفح ما ظل مجان انزيح

صافح اجفوف النذل للدينه ظل ممنون

غمض عيون العِرف لو كـَـالوا شيكلون

شاعر……… طفل………… مجنون