الشاعر / ذياب كزار
حدر التراجي برد …
والكَنطرة ابعيدة
وامشي واكَول
أوصلت
والكَنطرة ابعيدة
ونكَضني مشي الدرب
والشوق هز الكَلب …
والكَنطرة ابعيدة
حلمانه برد الصبح …
رجَّف خلاخيلي
يا دفو جمّل دفو ..
يا كَمر ضوّيلي
ويا ذهب خيط الشمس طوكَين سويلي
لايكَلي طوق الذهب والدغش ما ريده
وامشي وأكَول
أوصلت
والكَنطرة ابعيدة
* * *
لا لا يبرد الصبح ..
ما تحمل اجفوفي
ازغيرة زجواني العشق ..
واتوسّد ازلوفي
هيمه وجحيل الوكت ..
ما لمني نفنوفي
لوذي اعله بعد البعد ..
يا روحي
حدر ايده
وامشي وأكَول
أوصلت
والكَنطرة ابعيدة
