علي سمير
واكف بظهري جبل ناطح سحاب
وكبل حافظني وسط ظهرة بزر
علماني اكمشهن أطراف الحديث
وعلماني اتوضه وي طرت الفجر
وعلماني الضحكة عيبة بنص مضيف
والف كلمة تعادل بنظرة خزر
وعلماني الدنيا سهلة وصعبه حيل
بحر دنيانا البحر مد وجزر
وعلماني خدمة الزار الحسين
بوية كن مظلوم دوما تنتصر
بوية من تختار نثيه وبت اصول
لا تباوعها فقط من الخصر
لا تباوعها جمال وحلوة حيل
بوية خل عينك تصد على الجذر
أبوي كشخة جيلهم لو طب مضيف
تشوف كل عكال حدرة يستدر
رتبة اخلاقة تسولف بيها ناس
رتبة أخلاقه نجوم وجم نسر
بكلب امي وحدة متربع ابوي
وشوفة بالديوان متربع صدر
عكال لبسهن ثكل جلمات ابوي
الجلمة تطلع حلوة طرزها شذر
وعلماني الرزق بالدنيا الحلال
وشلون تشلع لكمة من عين الظهر
وعلماني المستحة وكطرة حياء
ماتطيح الكطرة حتة لو تنبتر
وعلماني الجار وحقوق الجوار
ولا تطول وكفتك ساعة عصر
ابوي مرجع مدرسة وأكثر ابوي
بوية ظلمة الدنيا وانت إلها بدر
حيل قصرت برثائك ياضواي
واني من تقصيري كلش اعتذر
