محمد السراي / ميسان
ها خذوج ها خذوج ومن وكت ما رجعوج
ها خذوج ومن خذوج اشلبسوج
انتي ابيض لابسه ومعتبرة
وانه ابيض لابس وبالمكبرة
عفتج ابنيه ومشيت اي مشيت
ومن مشيت ابنيه عفتج مو مره
بساعة الزفوج وانه ابجي عليج
ناس غركت ناس فاظت من دموعي السايحة
كتله عزرائيل مستعجل تعال
ولا اشوفن روحي يمج طايحة
ويه عزرائيل اخذ روحي ومشيت
وانتي فرحانة ابدلتج رايحة
رحتي واصوات الهلاهل عم وراج
وانه اضن بجفاي صارت نايحة
ناس تبجي وناس تضحك والفرق كلش جبير
ابين ضحكات العرس والفاتحة
امي تبجي وامي تنحب وامج ؟
وامج ابصوت الهلاهل صايحة
شنهي ذنبي انتي رحتي وعفتي عد اهلج فرح
وانه رايح وعفت عد اهلي الفواتح
انتي رحتي والعطر لايك عليج
وانه جسمي بريحة الكافور فايح
ارد اوكفج ارد اعتبج اهناك يم الله المعاتب
ايجوز اسامح
بس على السويتي بيه حته ربج ما يسامح
