علاء اليوداوي / واسط
روح براحتك يالمالي راحة وياك
يالشليت جدمي وعمري بالعشرين
جفك جنت اضنن وردة بيه تنشال
لجن من اعتنيتك بينت سجين
انه كلبي نجرح وي كلمة الله وياك
فلش باب كلبي لسان لو رجلين
حسرة بغيبتك چن حسرة الفلاح
اذا محصول زرعه صافي بس الطين
امر من الشماتة واسمعهم يكولون
وين الكلت اكمل بيه نص الدين
اسمك من اسمعنه الجروح تزيد
الاعمه يموت اذا جابوله طاري العين
خذك غيري ورحت چا گلبي ليش يروح
يمك ردلي كلبي الكلب وين الكاه
ولو ما أريده خلي يظل شمع وبخور
بشعلك لان ميت عله العافاه
بروده وياك عايش مو برودت روح
شخصك من يمرني هيج احس ملكاه
تمر شمس الله فوگي چماله نص تموز
رغم الحر اذكرنك وكول اشاه
يالخليتني بنص ديرة بس شمات
مو شمات غربة اشمتوا صحبان
مو بس الربع من رحت تدري شصار
جهال المنطقة يصيحولي ولفك خان
لون الوردي أبد ما شايفه من سنين
اسود شفت شكلك من جنت حلمان
موديلي ظرف كل ضني بي وردات
الورد ماشفته منك والصفن نيران
ومن كد ما عفت نار الغياب تفور
اليصل مايلكه جسمي يشوف بس دخان
