الشاعر / عبد الكريم القصاب
وين الكاك ؟
يل حتى ابمرايا الطيف …..
ماتنشاف ، ماتنجاس ،
يالماخذ الواهس والحلم وياك ،
يمذوّب اشموعي ابصفنة الوهواس ،
وين الكاك ؟
كون الكاك ،
ولو رشفة ندى مترب ،
واكولن من تصح ، لاباس ،
ولو نسمة عطر جلمة …….
تهز بيه وتر حساس ،
ولو رعشة على اجفوفي ،
من روس الاصابع ، بالدمع تنباس .
وين الكاك ؟
ياسبحة اسنيني المن أصابيعي ….
انفرطت مثل خيط الماي ،
يا كلبي الطلع دامع امن اعيوني ……
ابجنح لحظة ،……..
مثلما ينكظع ويضيع خيط انعاس ،
يا واهس الغبشة ……….
ابروح عصفورة ندى
اتمشط ازلوف الياس .
عصفورة حدايق ، ماده الجنحين
مرجوحة مرح بين الشجر والياس .
وين الكاك ؟
كل شي بلا طعم ، لا سالفة بلياك .
بعدك ماصدح صبح البلابل بالنفس
لافاخ مني الراس .
صفنة ولا هوه ايحرك غصن مياس .
دنيا بلا وجه ويّاي ،
دنيا اشفافها بوس اعلى ناس وناس ،
دنيا بلا طعم ، لا لون،
دنيا بلا ضــوه ابلياك ،
وحشة مكبرة ابلياك ،
وين الكاك ؟
كون الكاك ،
كون ترد علي ، كون ايحصل ملكاك ،
جا ردّت الدنيا اوياك ،
جا ردّت عروس ، اثيابها انا وياك ،
جا دكّت ايامي الصافنات اجراس ،
جا مدّت الكمره بساطها
وبات الكمر بالكاس .
كمره اتحل ضفايرها خمر فضي
يركص الكاس والوحشة
وخصر دنياي والاحساس ،
ومراجيح الضوه ابعيني
وعشب روحي ،
ويفوخ الراس .
كون الكاك .
وين الكاك ؟
