على شاتي/ بغداد
يمه ارباي عوفه ومااسولف بي
ولاليل السهرته ولاتعب شفته
اريدن جثتك ادفنهه حته ارتاح
جسمك بالنهر ياروجة ماخذته
ماكالولي مات ولاسمعت اخبار
كلب الام لبنهه اهواي عارفته
شربت اﻟﻤاي وبعطرك عمر غصيت
كلت اوليدي طاح وبالنهر جثته
الذبك بالنهر كون الله ذبه بنار
وياخذ ثار كلبي وشوغته وونته
حجي النسوان يلدغ من يمر العيد
حجيهن باﻟﻤكابر كوة حاملته
شني بيافتحة ابنج خيه ماتدرين
لو يم البحﻴﺮة اهناك دافنته
وبقيت اتخيلك بحلامي اغسلك عود
وجفنت الضنون وكلبي شيعته
دفنتك بالحلم من اصحه ازورك وين
وياحلم الﻴﺮد لو حلوة سالفته
يمه وجادرك ناصبته موبالباب
الجادر عالجرف يايمه ناصبته
كعدت اعله الجرف كشفت صدري اعليك
انفطر كلب النهر من صدري كشفته
صحت وينك ييمه وليش هيج وياي
كبل ايام ابوك بدمعة ودعته
صحت وينك ييمه العمر كسرة ريش
مايرجع عدل لوحته جبرته
ياابني وعضيدي اثنينهن تجواي
ياشعرة دليلي وحوبته وبخته
يابوشية اختك من تروح اتطيح
احنه ابعازتك واﻟﻤوت مو وكته
انه ابعازة اجنازة اطبلي جوه البيت
انه بعازة ضغيب اوليدي فاكدته
انة ابعازة الهوسة وﻟﻤة يم الباب
انه ابعازة الصوت اصياح صاحبته
حسرة بكلبي ضلت شيلة التابوت
اريد اتباهه اكول اوليدي فاكدته
عله زندك وشم ياامي اغله الناس
وقلب الحب علي بجفوفي راسمته
اذا موسى بعصاته اﻟﻤاي شكه وفات
انه بنوحي وونيني اﻟﻤاي شككته
