صلاح مهدي الشمري / بابل
عشكتج جن عشك شتلات
عطشن حيل رادن شوفة اﻟﻤطرة
فجأة ولن الج حسيت..
احبج حيل عالفطرة
يضي عيناي !!
من تربي عليج العﻴﻦ
كلبي يضل أبد ميدك ..
من كد الحلاة البيج شفت الدود ديمطك! !
ليوسف صح كبل نسوان
كطعن ايد وخبرهن بالكتاب انجاب
لو انتي ويه يوزرسيف
جان تكطعت لركاب !!
نيتي وياج … نية جاهل زغﻴﺮون ..
يضحك ويه ليبوكه
من هاي انتي قيسي وعاد
كلبي شكد ترف شوكه
اتمنى انتي إلي تصﻴﺮين
وأم أطفالي تتسمﻴﻦ
وتجيبيلي خوش وليد
تربينه اعلى تربيتج
يهنياله الهوه بريتج .!!
اﻟﻤا حس بجمالج هذا مو حساس
تلكه احساسه بس كطرة
اﻟﻤا ضايك سوالف عوز
يحس شلون بالفقره
يمكن الله من سواج
كب فوكج عسل وي هيل !!
رد حط طﻴﻦ حطج نطفة بالاصلاب
اجتي الوالدة وكملت جمال لبيج
يمكن هيج اضن صرتي
وطايح بيهه هاﻟﻤكرود !
كمت كلما أطب حضرات
أمد ايدي ..وكولن وين
وتصﻴﺮين الي مريتي
احبج كومة مدري شكد ..؟
إذا خدج يجوع بيوم
أصبله غده بوسات !!!
أعرفه شيشتهي آني الخد
ياوردة حياتي شبيج
أريدن حيل اشمنج
ذكرج مايفارك بال
امنباوع بيه أشوفنج !
بحيث أني وصلت لحال
نسمة اتمنى لو مخلوق
أجيج اني أركض وفحطان
اطب بريتج اتختل
واذا موعد زفﻴﺮج حان
يحشمني النفس
وك كوم اضل بحجة ما أندل
أحبج هيج كد التل !!!!
غيابج صار جن منجل
ورد روحي أحس يذبل
صدكيني آني حيل اغتاض
اذا عفتيني لو كبصة !
أحس بروحي هم صياد
مايلفي السمج شصه .،،
منشوفج أحس شفت لعيد
جن بدوي وجهب عاكول
مرقد صار اله وصلة
بعشكنه تلاثة بس يدرون ..!
آني ..وانتي . ويه الله
