محسن الدخيلي

البصرة زعلانة يَعَبد الله عليك

أو حَلِّفتْني اتريد اوديلك تمر ما بيه نُوَه

تخاف حگهه اعله النُوَه ايخضر غريب

تخاف حگهه اعله النُوهَ ايخضر ذليل

أو تدري انته افضاله الفقره النوه

الگاع حصتها النوه…..

الگاع والفقره يَعَبد الله سوَهْ

اشلون ترضه اتبات وي چتال أبوك أو من هواه تاخذ هوه

الغربة تكتل ونته بس ريحة عدل وبلايه صوت

الغربة هيكل عظمي موت ابلايه موت

اتهون من تفرش اديك أويه الدعاء…اتهون بس اشلون بالماعنده ادين

اتهون من تلگه دمعتك بالسماء اتهون بس اشلون بالماعنده عين الغربة كاس…..

الباع روحه ايعيش وي روحه غريب ابلايه ناس

الباع جنسيته أو هويته أو باع ساسه ايعيش عمره ابلايه ساس

الباع مسقط راسه يبقى ابلايه راس.. ابلايه ديرة…. ابلايه دار

الديرة والبستان وانه أوگبر أبوك… انحارب الهل يوم والديرة عُمارْ

اشماخذك ونته ابن أبوك…… الوحشة تكتل ونته لا ديره ولا بستان أبوك

أو دمعة أمك صارت اعله الگاع دمعتها مزار…. الغربة تكتل

إي يعبد الله تره الغربة حصار.. العازه كلفة

أوكلفة من تخله تره چفوف الشريف…. إيه ياوسفه يعبد الله صرت عبد الرصيف

أوچانت أمك انته تذكر من تجوع يصير….مدري شلون چف أمك رغيف

الغيرة جام..لا يعبد الله حرام اتبوگ چف أمك حرام

اشلون ترضه اتعيش وي چتال أبوك أو تَمِّنْ أوگلبك ينام

أوتدري انته الگاع بالممشه تره اتبوس الجدام

أوبوسة اجدامك تراهي الگاع غير أهلك حرام

أوشارة اليحلف تره ابگاع الربه شارة إمام

البصرة زعلانة يعبد الله عليك مارضت حتى أوديلك سلام