أحمد مهلي / بغداد
اريد ادري اعله يا غيمة النهر زت للگصايب شيب
بس من طاح ترجية
اريد ادري المشاحيف المشت للبير تتحفه
اعله يا سچه ويصير الماي عوجية
وشموس المساحي اطيح يم ذيج البيادر فّي
واحوچه لكل متن طاحت شمسهه هناك خاچية
اريد الگه الزلف حنه اعله بيبان العطش
بالطيف من يمطر صبح بيه
وادور كل شبابيج العجد والگه الهوه متيه بالمرايات
وانشد روحي شديتي الهوه بشباج يا رية
وادور عالسلف نجمة بضفيرة كل عرس نيه
شحلاة الرزه من تصير بعيون اليتيه بالسچچ گمره
تاه بجفك شجم طير من راد الهوه يعثره
وانته شچم بلم حاچيك شالك سالفة بخصره
دليني النعش لو راد يغبش للمناجل طيف
تلگه شچم شمس بالطين تحلم بالصبح مطره
قمصان شكثر بالبير ومتانيك
يمته اطيح من جف الحلم گطرة
يهلبت يم هذاك الباب تلتم ساجيه الصحره
يهلبت من هذاك الباب ينباك الزلف مرة
مر بيه المطر لو طاح ما يدري
بوجه يا بيرمن يسولف ذنوبه
مر بيه اليتيه يشوف ملگه
اعله التراب وياك تكبر بالهوه ادروبه
جا جم دوب مامش للنذر شباج
يتبده اعله كل حوبه
انه ادري الحنه للبيبان
مو مدري اعله يا تابوت مصلوبة
ما اريد السنابل ماي تتبده لعطش مرواح
اريد البيدر امن يطير الگه بكل مجان اجناح
ولا اريد الكبر يكبر اذا يسمع ترابه صياح
اريد امن التراب اطيح والگه شجم شمس
تغبش كبل شمس المساحي وغبشه الفلاح
اريد الطيف من اصحه الصبح ينلاح
وارد تايه هوه برازونه السرداب
واسوي السچچ ذيج احجول
واخر سجه من تموت مدفونة بكبر يا باب
الديرة الما تشيلك شيب مدري بيا نهر تلكاك
ما تلگه لعطشهه ثياب
والگه بكل جرف وادم تصلي شما لكت تنور
جيه من طين وتغني الكناطر ماي صار تراب
