علي حسن الشويلي/ بغداد
اندلك لون خطوة اعلى وجهه الماي
اندلك ولون وركة بخريف اشجار
اندلك واطش ملكه اعله وجه الغيض
وهلا بشوفك اصيحلك
ولو ادري اصدك يا نهر ماكاتل انسان
الهوه العالي شكثر مكروه لو مر بصريفتنا بس بعازته الغركان
وحب الكاع ويه الماي حب مجبور
لو يتزاعل وياهه يترس كل وجهه افطور
شجانه اناطر السجين
وكتنه شما يفر عينه
يمدنه انذور ولاتسال شجاك تخون
صرت خبزه بكحط يوسف
وناسك كلهه عدها اسنون
واذا جدمك عثر بالكاع
مو ذنبه ذب اللوم عالعيون
وانسه الراح تعال اتبده بحضاني
تعال ولمني من فركاك
كبل مااصير من قسمة شخص ثاني
تعال وياي حلاة الماي من يختاض
يتيه ومايظل براي
وحلاة الدنيه عدي اتصير
لون كضيت عمر وياي
البروحه عرس مزروع
مايعرف سوالف ناي
وترى العطشان من الشوك
ما يرتوي بكل الماي
ولاتنسه اليطيح من السمه تتلكفه الكاع
ولاتنسه السفينة اجنازة وسط الماي
لون هدت بلايه اشراع
ولاتنسه ما تعرف طعم حبك لون
ماضكت كبله اوداع
