الشاعر / مهدي عبود السوداني
إذا تسال طفلنه ((اشلونك)) ايگول
يعمي شلوني، وهل شاب راسي
فطنت اعله الحروب وعوز وارهاب
ورضعتني بثداياها الماسي
وشفت وادم اذا تتخيل الميز..
اعله ربه من تنشده يگول ناسي
مستقبل وطن ميهمه لو راح
عنده البوگ بس همه الاساسي
واذا هيچ السياسة اتخرب الناس
اذا.. من حقي اكره كل سياسي
نفضل مثل ما الله خلقنه
نعيش احرار حتى بلا جناسي
الوطن يحترگ كله وللسمه النار
يطفه شلون..؟ بالحچي الحماسي..!؟
عفانه اشگد حملنه اجروح واهموم
ثگلهن يفصُم اظهور الرواسي
اخو يكتل اخو.. والاجنبي يصول
ونتذابح على الكرسي الرئاسي
الف رحمة اعله ابو العامل وفلاح
والا تباً على السوَّه الكراسي
المايخلص الشعبه اتدوسه الاقدام
واليخلص اخليه اعله راسي
