حسين القاصد
اغلى المضكورات بالكتب هو الهوا ، وهو اكثر شي مضكور ، والهوا هو السبب باستمرار الحياة ، واتضكر مرت أيام علينا ماعدنه بس (الهوى والماي ) وكَلنه لابو عداي ولايهمك .. والمطربين بكيفهم ، واحد منهم فرحان لأن الهوى بيد الله مو بيد حبيبه ويكَول (همزين بيد الله الهوى .. ) اي وعلي كلش همزين !! جا بالضيم لأن احتمال حتى الفضائية اللي تطلع بيها هاي الاغنية يصير البث مالها بالقطارة !! ماعلينا بالوادم .. يكولون عبد الحليم حافظ اول واحد ادعى انه ( ابو الهوى ) ويكول : الهوى هوايا !! وهذا صاحبنا يكول بيد الله !! وسالفة ابو الهوى تشبه الفشار اذا تفتهموني صح !! والهوى اذا صار قوي يسمونه ريح والباب اللي تجي منه ريح سده واستريح ، كلش دايخ اني بسالفة الباب .. يعني لوما الباب جان ماكو ريح اساسا !! هم ماعلينا ، وابو الهوى هذا هو اللي يتحكم بالهوى .. وتصادف مرات بالقنوات (البغدادية ) برامج على الهواء مباشرة ، ويحجزون الهوا كله ويصير مرادم بين الضيوف والمشكلة اغلب الضيوف بوقتها يكونون مجرمين بس جريمة (نظيفة !! ) لأن كل السرقات والبوكَـ حرام!! ماعدا ان (تبوكَـ ) هواا .. وهذا اللي يطلع مباشر اعتيادي راح يحجي على الوضع الامني ويساند المجاميع الارهابية اللي تمول القناة .. بس المشكلة الوادم كلها تتابع برنامج مال (حرام ) لأن اساسا الضيف والقناة بايكَين هوا !! وخانكين الوادم بالتصريحات والتجعبن !! لا يا ابو الهوااا على هالسالفة الغمة .
