حسين القاصد
بوية أدري اليوم الاثنين والعباس موتحشيشة، وما يحتاج اضكركم واكَول: الجمعة مضكورة هواي بالكتب، بس اني بالجمعة نسيت اكَلكلم (جمعة مباركة) لأن رحت علمودكم للمتنبي حتى اشتري كتب جديدة واشوف شكو مضكور بيها واحجيلكم!! بس الصراحة انصدمت !! لأن شفت اغلب المسعولين على صلاة الجمعة مايصلون الجمعة ولا (يذرون البيع ) وكلها تبيع ومحد يون!! ماعلينا بالوادم بس حبيت اخبركم بالناس اللي شفتها!! شفت مدراء عامين بس ماتكدر تحاجيهم الا تترخص من فيلق الحماية مالتهم، وشفت خطية واحد محافظ ولابس قمصلة جلد ويسوي نفسه مايدري بالحماية اللي طوقوا القيصرية، وشفت ادباء (سزز) يتلوكَون لحيدر الملا وهو يتجول بالمتنبي.. الله ينتقم من كل مسؤول يدخل لشارع المتنبي بحذائه!! جا غير جمعة وتروحون تصلون؟؟ تشوفون ساحات العز والكرامة؟؟ تتابعون قناة البغدادية بلكي خبر عاجل ماشايفه البزاز؟؟ هاي كلها عفتوها واجيتونه واحنه كاعدين يم حافظ ابو الجاي وكريم حنش!! ويجي واحد ويكول: جمعة مباركة!! بوية الوادم بالمرسى تجمع اصوات!! ماعلينا، اني فكرت بالسبت اكول (جمعة مباركة) بس تضكرت السبت لليهود!! وحاولت بالأحد ومارهمت لأن كلت الاحد للمسيح وخاف يكولون عميل للامريكان!! بس بقت بذمتي ومادام اليوم الاثنين.. بوية (جمعة مباركة) على كل العراقيين.. باستثناء الذين افسدوا علينا جمعة المتنبي.
