حسين القاصد
شدهان من بنغلادش واسمه شادان مدري شاتان !! المهم هو قريب من اسمه اللي شاع مؤخرا وذاع صيته بين البارات والنوادي !! وشدهان حبّاب وخوش ولد ومطيع ومايبوكَـ لأن عمره مامفكر يرشح للانتخابات !! ، شدهان يحب عدنان الفضلي ويكَول على اساس هم أقارب !! واكثر من مرة عدنان الفضلي يسولف وي شدهان واحس يتعامل وياه بخصوصية !! بس مع ذلك هذا مو دليل لأن عدنان الفضلي يحب الوادم والوادم تحبه وماله علاقة بالوضع الامني !! يعني ماعليه اي شائبة !! واحتمال شدهان حسبها حساب عرب !! (على اساس العرب مضبوطين !!) وكَال خل ادخل الوسط على مسؤولية عدنان الفضلي وابو غزوان محبوب ، وصدكَـ قبل ايام على الرغم من اغلاق البارات شفت صورة للفضلي هو وشدهان بالفيس بوك وتضكرت الايام (الخوالي ) و(العمامي ) !! ، ماعلينا ، يكولون شدهان دازيله كَوامة.. من بنغلادش ويعيرونه يكولون : ليش تذب جرش وي اهل العرك ! والبنكَالين دولة اسلامية !! وتستحرم ، فشدهان جاوبهم : بوية ذولة الوادم مسالمين ومن يكعدون ورا ربع ساعة لو يبجون لو يغنون !! ماعدهم غير سالفة !! حتى ما يندلون قناة البغدادية ولا البزاز ومالهم علاقة بطارق الهاشمي اساسا .. !! وماصدكَوا البنكَاليين !! الا حلف شدهان وكال : بوية ذولة الوادم حتى ما اعترضوا على غياب ذررررررغام من التشكيلة طيلة تواجد ناجح حمود وحكيم شاكر !! يابوية ياذرررغام .
