حسين القاصد
اليوم اريد اسولف لكم على البرد مال كَبل مو هذا البرد الكلاوات اللي حتى انفلونزا ام اسبوع مايدبر!! ، اي بوية ، كَبل 30 ألف سنة يكَولون صادف الشتاء بتموز وجانت الوادم بالضيم حالها وجان ابو المولدة يتكَلب ومايشغل والحر تكَول جهنم !! والكهرباء مال كَبل جانت خلصانة لأن كلها صدرناها للدول الفقيرة !! وبهاي الاثناء وبالدقايق الاخيرة سجلوا علينا هدف السعودية مع العلم احنه جنه نلعب وي الاورغواي وجان حكيم شاكر مال كَبل معاند ماينزل ذرغام لأن ذرغام مايصلي جمعة بجامع يونس محمود !! شنهي ؟؟ شو تاهت السالفة من البرد مدري من الحر ؟؟ ماعلينا ، يكولون بهاي الاثناء ويجفت الشتاء وتصير الدنيا ثلج وتاهت الحسبة ، الوادم كامت تشتري حلفة مال مبردة وتوصل للبيت تلكَاها باردة ثلج ويشعلون الحلفة ويتدفون !! وناس تشتري فتيلة مال صوبة ويوصلون للبيت ويلكَون الشتاء مالتهم (سحب ) يعني الجيران عدهم وهم لا !! فيلزمون الفتيلة ويهفون الى ان يجيهم البرد !! واكو ناس بنفس البيت عدهم شتا وصيف وذولة يسمونهم جماعة (نارهم تاكل حطبهم ) المهم السالفة الزينة اللي فرحت بيها الوادم هي ان الشتا لمن اجه بعز الصيف كامت تمطر وجان موسم انتخابي وطلع عبعوب مال كبل وانقذ الوادم وركضن النائبات كلمن ماسحتها بيدها وكامرتها بيد الحماية .. المشكلة كلهم تصوروا بذاك الوكت بس ولا واحد جاب صورة وحدة تثبت وجود الشتاء بعز الصيف !! وقيد البرد ضد مجهول وحبيتك بالصيف وحبيتك بالشتا !! الله يسامحج فيروز هو الصيف مال حب ؟؟ عمي الحب للشتا لأن يحب الدفو !! اوووووف .عمت عيني على ذررغام !!.
