حسين القاصد
عامر مضكور بكل الكتب ونوبات هو يتحرش بالكتب ، وعارف هو عارف بكل شي وهو يدري بالكتب شنهي المضكور بيها وشنهي المامضكور ، اكيد عرفتوهم اقصد عارف الساعدي وعامر عاصي ، وعارف بالنسبة لي اعتبره هوية القصيدة التسعينية العمودية ووزير اعلامها كونه الاشهر من بين الذين كتبوا القصيدة العمودية الزينة مو ام الطلاكَتين مثل شعراء الغفلة الحايرين برد (العجز) عالصدر !! عبالهم فد مشكلة هسة رد العجز عالصدر!! العالم صارت عدها فضائيات وكلشي كامت تعرف!! لاتفتهموني صح فدوة، اللي اريد أكَوله: هو من اجمل الشعراء اللي احبهم هو شاعر الطينة الجنوبية عامر عاصي وعامر مسودن من الزينين، لأن بالشعر الشعبي لايجارى (زينة لايجارى موو؟) هاي من غير الفصحى و(بيت الطين) ومسعود العمارتلي وهاي كلها بعض من قصايد الوجع عند عامر، وقبل ايام سمعت طركَاعة لعامر عاصي، حتى امرؤ القيس لو سامعها جا طلكَـ ام جندب وكتل علقمة الفحل!! (علقمة صدكَـ فحل لو دعايات!) ماعلينا بالوادم، نرجع لقصيدة عامر عاصي يكَول: (خايف يجيني صبح مابيه بنات ازغار!! ولا اورح للمدرسة ولا ادري بيها شصار.. احلامي خوف وقلق وطيارتي من ورق والسما اشتعلت نار) لايابه قصيدة الشعر!! عمي والعباس هذا شعر خالص لوجه الشعر، زين خلونه من عامر عاصي ، تعالوا نشوف عارف الساعدي، وعارف شاعر كلش.. اتضكر ابيات من قصيدته يكَول:
من قال هاجر هذا البحر وهو رأى
اني أسحل خدود البحر بالحبل
البحر اول اطفالي سأتركه
يلهو على أرجلي، يغفو فاستجلي
اي بعد أخوك ابو الطيب عارف الساعدي استجلي ياهو الكاظك، إلك ولاهلك، ها اتضكرت ترى هاي المضكورة مو عن فراغ !! اولا : هم يستحقون. وثانيا: عارف وعامر مثلو العراق اجمل تمثيل في مهرجان الشارقة.. شكو عليهم اذا واحد يسحل بالبحر والثاني طيارته من ورق والسما اشتعلت نار!!. تحياتي لهما شاعرين كبيرين.
