حسين القاصد
السالفة مالها علاقة بالثغافة الغومية لابو حتى ساطع الحصري ! ولا بالمهمشين ، وحتى طارق الهاشمي صاحب براعة اختراع الصفويين الجدد مايدري شنهي السالفة ، وحتى الكتب كلها مامضكور بيها هيجي شي ، لأن الكتب هسة كلها مشغولة بمحمد تميم وبسكويت الاردن .. مختصر مفيد ، مو هذا مفيد الشيف ( لأن اذا الشيف هيجي سمين جا الركَية شكَبرها ) ، ماعلينا بالوادم ، اكو معاونة مال مدرسة ، هي المعاونة الوحيد اللي على وزارة التربية فورا ان تصدر قانون لجميع الطلبة حتى يمنعون الطلبة من مناداتها (ست) ولازم يصيحولها (خالة ) وخالة وياخالة !! أها أها أها .. شكو بيها !! هسة يجي واحد ويكَول سويتها رطينة شتريد بالضبط ؟ اي بوية هسة تعرف شريد بالضبط ..
اناشد وزارة التربية من اجل حلحلة الازمة ( شنهي حلحلة ما ادري ؟؟ ) بأن تخصص حصة كبيرة من البسكويت لمتوسطة المجد العربي ، لأن المعاونة مال المتوسطة عندها حانوت وتبيع على باب الله والراتب مايكفي !! واذا اجا واحد يسأل على ابنه واذا ابنه من ذولة اللي مايشترون من المعاونة (بلقيس) ، راسا تكول لابوه ابنك موزين ومو خوش ادمي ووكح ، من رخصتك شوية واجيك !!
ـ ها ست ابقى لو اروح ؟؟
.. لا ابقى هسة اكمل لك السالفة .. يله طلاب اشتروا بسرعة راح يدكَـ الجرس وعندي مراجعين !!
ـ خالة بلقيس بس ابني يومية يشتري منج ويمدح بيج هواي ..
.. لا بس لا هذا الحباب الخوش ولد !! هذا وردة مال الله !! بس عفية بعد لاتجي بالفرصة لأن اني على باب الله ، تعال بالدرس واني اعوف الطلاب وافتر وياك على المدرسات كلهن !!
ـ خالة انتو هم تابعين لوزارة البسكويت ؟؟
.. اي عيني بس يكولون اكسباير !! هسة شبيه الاكسباير ؟؟ هم الطلاب كلهم كسالى ، خالة بلكي تعرف احد بالوزارة وتخليهم ينطونه حصتنا لمتوسطة المجد العربي تابعة للكرخ الثانية ، اني بلقيس المعاونة ام الحانوت مال المجد العربي ..
