حسين القاصد

     الأطرش مضكور بالكتب هواي، والخياط مضكور كلش، والاطرش دائما يحب الاعراس والوادم دائما تشوفه بالزفة!! حتى صار مضروب بيه المثل ، والخياط هم مضروب بيه المثل ، يكولون الخياط اللي خيط بدلة العرس، واذا الاطرش بالزفة فاحتمال الخياط ابرته عمية !! لاتفتهموني صح فدوة !! رباط السالفة هو لما غنى فريد الاطرش على الليمونة ( فوق غصنك يالمونه ) وغنى ( لكتب عَ وراء الشكَر) محد اعترض ، ولمن غنى سعدون جابر اغنيته المدري شنهي !! وكَال (خيو وركَات الخس !!) محد اعترض ، بس لمن غنى صباح الخياط ( ابو خد مشمشة ) كَامت الدنيا !! وسموه مطرب الفواكه ، والسالفة كلها سالفة (مزة ) والوادم تحب الخس واكو وادم تحب الليمون ، وناس تحب (البرتقالة ) ، والزلمة يعجبه المشمش ، ثم تعالو بوية ، ياهو منكم اكو شارع ؟؟ دربونة ؟؟ دكان ؟؟ يحمل اسمه ؟؟ يعني اكو مدن تغيرت اسماؤها ، ويومية يسمونها اسم ، حتى صارت الوادم ماتعرف اسماء المناطق الاصلية ، كل هاي وبقت ساحة مصرة على اسمها الشعبي الذي يستحق ان يكون رسميا ، اقصد ساحة صباح الخياط ، وهي من اشهر ساحات بغداد، ملاحظة : ساحة مظفر مالها علاقة بالشاعر مظفر النواب ، لا بوية ، يكولون طبيب اسمه مظفر جانت عيادته بالساحة .. جا تردون امانة بغداد تسمي ساحة على اسم شاعر !! لا بوية الامانة لحد الان عايشة بزمن بطل التحرير الغومي ، جا العباس عليكم شجاب (الشلامجة) على شارع من شوارع احد الاحياء بالكرخ ؟؟  تعيش ساحة صباح الخياط ابو خد مشمشة.